Sjá - Óháð ráðgjöf

Alþjóðlegi vefaðgengisdagurinn

Sjá — Wed, 09 May 2012 09:15:34 +0000

Í dag, 9. maí, er alþjóðlegi vefaðgengisdagurinn. Við skorum á alla sem vinna við tölvur að taka músina úr sambandi í eina klukkustund og láta okkur svo vita hvernig gekk.

Til hamingju með daginn!

Framleiðni og innri vefir

Sjá — Mon, 07 May 2012 11:25:40 +0000

Í nýjasta pistli sínum fjallar Gerry McGovern um framleiðni starfsmanna og raunverulegar ástæður þess að innri vefir standa ekki undir væntingum. Samkvæmt honum er rót vandans aukin krafa um vinnustundir sem í raun felur í sér minni framleiðni. Skoða þarf innri vefi með það í huga að einfalda ferla og þannig tíma sem fer í verkefni – án þess að bæta við tímum annars staðar. Smellið hér til að lesa pistilinn.

Fjórar góðar leiðir til að pirra notendur

Sjá — Thu, 29 Mar 2012 16:31:22 +0000

Auðvitað er hægt að pirra notendur á ýmsa vegu en í þessari skemmtilegu og fróðlegu samantekt frá System Concepts eru fjórar leiðir nefndar.

Fela mikilvægt efni neðarlega á síðu
Nota tölvutal
Setja mikilvægt efni fram í myndum
Ná athygli notenda með hreyfimyndum sem engin leið er fyrir notandann að slökkva á

Íslensku vefverðlaunin 2011

Sjá — Sat, 04 Feb 2012 15:24:10 +0000

Íslensku vefverðlaunin 2011 voru afhent við hátíðlega athöfn í Tjarnarbíói í gær. Margir glæsilegir vefir voru tilnefndir að þessu sinni. Sjá má vinningshafana á vef Samtaka vefiðnaðarins.

Hér má sjá umfjöllun um vefverðlaunin í fréttum RÚV 3. febrúar 2012

Lyklaborð fyrir blinda

Sjá — Sat, 28 Jan 2012 17:03:57 +0000

Árlega stendur Stanford háskóli fyrir samkeppni um frumlegar nýjungar í tengslum við tölvur og tækni. Vinningshugmyndin í ár var lyklaborð á snertiskjá fyrir iPad. Skoða grein um vinningshugmyndina á vef Wire.

Hvernig eiga tenglar að vera?

Sjá — Tue, 24 Jan 2012 15:59:16 +0000

Í nýjasta pistli sínum kemur Gerry McGovern með góðar ábendingar um hvernig sé best að skrifa tenglaheiti. Þau þurfa að vera lýsandi fyrir það sem undir liggur en mikilvægt er að þau séu ekki of almenn eins og oft er. Eins er mikilvægt að hugsa þau út frá notandanum en ekki innra skipulagi viðkomandi.

Lesa pistil Gerry McGovern: Tips for writing great links

Vefur Reykjavíkurborgar aðgengilegur fötluðum

Sjá — Thu, 24 Nov 2011 10:37:25 +0000

Vefur Reykjavíkurborgar hefur nú fengið aðgengisvottun, en vottunin er veitt af Öryrkjabandalaginu og ráðgjafafyrirtækinu Sjá ehf. Í þessu felst að vefurinn er aðgengilegur öllum notendum óháð fötlun eða getu. Jón Gnarr, borgarstjóri, tók á móti fulltrúum Öryrkjabandalags Íslands sem afhentu honum skjal til staðfestingar á vottuninni.

Vottunin felur einnig í sér skuldbindingu Reykjavíkurborgar til að fylgja þeim kröfum sem settar eru fram varðandi aðgengi á vefnum. Miðað er við gátlista Sjá ehf. sem fylgir í meginatriðum gátlista W3C (World Wide Web Committee), frá Website Accessibility Initiative (WAI) sem gefinn var út 1999.

Í þessu felst að hópar fatlaðra sem af mismunandi ástæðum geta ekki eða geta illa nýtt sér hefðbundna framsetningu efnis á vef geta nú notað vef Reykjavíkurborgar. Hér er til að mynda átt við blinda, sjónskerta, hreyfihamlaða og fleiri hópa. Dæmi um atriði sem falla undir vottun um aðgengi:

ALT texti þarf að vera á öllum myndum, myndatenglum og myndahnöppum
Bjóða þarf upp á að minnsta kosti 2 stillingar á leturstærðum og 1 litastillingu (ljóst letur á dökkum bakgrunni)
Leiðbeiningar þurfa að fylgja allri virkni eins og útfyllingu eyðublaða og þess háttar.
Tenglaheiti þurfa að vera skýr. Tilgreina þarf nákvæmlega hvert tengillinn leiðir notendur.
Reitir í formum þurfa að vera rétt skilgreindir fyrir skjálesara, nota þarf „LABEL for“ skipun.
Útskýra þarf skammstafanir eða merkja þær sérstaklega
Nota þarf stílsíður (CSS, e. Cascading Style Sheets) í uppbyggingu vefjarins.
Ekki nota töflur eða myndir til að sníða útlit.
Veita þarf notendum upplýsingar um stærð og snið skjala (til dæmis. PDF 20Kb).

Í dag var einnig opnuð auðlesin útgáfa af vef Reykjavíkurborgar á slóðinni www.reykjavik.is/audlesid. Þar er að finna upplýsingar um helstu þjónustu Reykjavíkurborgar, settar fram með auðlesnum texta, fyrir þá hópa sem eiga erfitt með að nýta sér hefðbundna framsetningu efnis t.d. vegna leserfiðleika eða þroskahamlana af ýmsu tagi.

http://www.reykjavik.is/desktopdefault.aspx/tabid-4550/

Bæði þessi verkefni voru styrkt af ESB í gegnum verkefnið EGOV4U sem Reykjavíkurborg er þátttakandi í.

Frá vinstri: Hjördís Anna Haraldsdóttir, varaformaður Öryrkjabandalags Íslands og Jóhanna Símonardóttir frá SJÁ, sem er samstarfsaðili ÖBÍ um vottun vefsins, afhenda Jóni Gnarr borgarstjóra og Hreini Hreinssyni, vefstjóra Reykjavíkurborgar, viðurkenningu um aðgengisvottunina.

Verstu vefir í heimi

Sjá — Thu, 17 Nov 2011 09:07:56 +0000

Við þekkjum það öll að rekast á vonda vefi á vafri okkar um netið. Hér má finna skemmtilega samantekt um það sem vefmiðillinn Manolith kallar verstu vefi í heimi. Skoða grein.

Til hamingju með Usability Day!

Sjá — Fri, 11 Nov 2011 09:58:53 +0000

Í dag er World Usability Day haldinn hátíðlegur víða um heim. Dagurinn í ár er helgaður menntun – Education: Designing for Social Change. Margir áhugaverðir viðburðir eru haldnir á heimsvísu í tilefni dagsins. Skoðið viðburðina hér.

Til hamingju Reykjavíkurborg

Sjá — Sun, 06 Nov 2011 18:41:25 +0000

Vefur Reykjavíkurborgar hefur nú hlotið aðgengisvottun Sjá og ÖBÍ um forgang II. Í þessu felst að ítarlega hefur verið farið í gegnum vefinn og hann aðlagaður að þörfum notenda með ólíkar þarfir.

Þetta er glæsilegur árangur og við óskum borginni til hamingju!

Hvað felst í vottun Sjá og Öryrkjabandalagsins?

Vottun Sjá og Öryrkjabandalagsins felur í sér skuldbindingu fyrirtækis/stofnunar til að fylgja þeim kröfum sem settar eru fram varðandi aðgengi á vefnum. Vefur er “„aðgengilegur”” ef allir notendur hafa aðgang að og geta notað efni vefjarins óháð fötlun eða getu. Sjá nánar um vottun vefja.